Acari ‘kaplon’ Zvicrën

Në Samedan, në Engadine, temperatura ka rënë në -26.3 gradë

Nata e premte ishte më e ftohta deri më tani këtë dimër. Në Passo del Forno (GR) termometri regjistroi -28 gradë. Në Samedan, në Engadine, temperatura ka rënë në -26.3 gradë. Në Ebnat-Kappel (SG) këtë natë ishte -15,8 gradë, në Egolzwil (LU) -15,3 dhe në Tänikon (TG) -15,0. Temperaturat e ftohta u shkaktuan nga një rrymë arktike që mbërrin direkt nga Poli i Veriut, raportoi MeteoSwiss. Ajri i ftohtë i kombinuar me qiellin e kthjellët krijuan një natë të ftohtë, transmeton albinfo.ch.

Edhe më ftohtë se në Forno Pass – sipas SRF Meteo – ishte në Alpe Hintergräppelen (SG), ku u regjistruan -31.6 gradë. Në Sägistalsee, në Bernese Oberland, merkuri madje u ndal në -36.6. MeteoSwiss, e kontaktuar nga Keystone-ATS, i vlerësoi të dhënat si të besueshme, megjithëse nënvizuan se bëhet fjalë për vende me kushte ekstreme dhe larg vendbanimeve. Sipas MeteoNews, temperaturat më të ulëta janë regjistruar në mesnatë dhe më pas janë rritur lehtë.

---