Kurti: BE-ja është qëllimi i Kosovës

Në nisje të takimit në kuadër të “Planit të Rritjes për Ballkanin Perëndimor”, Kryemministri i Kosovës, Albin Kurti, është shprehur të hënën se Bashkimi Evropian, Shtetet e Bashkuara të Amerikës do të mundësojnë sa më shumë bashkëpunim rajonal dhe “ecje më të përshpejtuar drejt BE-së që është qëllimi e fati ynë”.

Sipas Kurtit, Brukseli e Uashingtoni janë të angazhuara me Ballkanin Perëndimor për rritje ekonomike.

“Vlerat e BE-së duhet të bëhen reforma, ndërkaq mbështetja e BE-së duhet të jetë financiare. Republika e Kosovës sot do të dorëzojë listën e reformave të diskutuara, ndërkaq ditët në vijim do të dorëzojmë listën e projekteve indikativë. Sa u përket reformave, aty e kemi në qendër reformën e administratës…Ndërkaq, për projekte e kemi energjinë e gjelbër”, është shprehur Kurti.