BE-ja zhbllokon ndihmën prej 50 miliardë eurosh për Ukrainën

Frederic Köberl @internetztube

Bëhet e ditur se të 27 liderët evropianë kanë rënë dakord për një paketë ndihme prej 50 miliardë eurosh për Ukrainën, ka thënë presidenti i Këshillit Evropian, Charles Michel, të enjten, shkruan BBC, përcjell albinfo.ch.

“Ne kemi marrëveshje”, shkroi Michel në “X”, dikur Twitter.

Ai ka thënë se marrëveshja “mbyll një financim të qëndrueshëm, afatgjatë dhe të parashikueshëm për Ukrainën”.

Kishte frikë se kryeministri i Hungarisë, Viktor Orban, do të bllokonte paketën e ndihmës, siç kishte bërë në një samit evropian dhjetorin e kaluar.

Orban kishte thënë se donte të detyronte rishikim të politikës së BE-së ndaj Ukrainës dhe kishte vënë në pikëpyetje idenë e angazhimit për të financuar Ukrainën për katër vjetët e ardhshme. Por duket se ai është bindur të mos vërë veton pas kërcënimeve për bllokim të ekonomisë hungareze.

Ursula von der Leyen, presidentja e Komisionit Evropian, ka thënë se sot ishte “një ditë e mirë për Evropën”.