10 policë dhanë dorëheqjen gjatë janarit

Kryetari i Sindikatës së Policisë së Kosovës, Imer Zeqiri, ka thënë se rreth 10 pjesëtarë të Policisë së Kosovës e kanë lënë punën gjatë janarit.

Ai ka thënë se ata janë dorëhequr për shkak të mosplotësimit të kërkesave të tyre për kushte më të mira.

“Unë, zyrtari policor [emri-mbiemri] përmes këtij raporti paraqes kërkesë për dorëheqje nga ekipi reagues i policisë për arsye të mosplotësimit të kërkesës për shtesat e rrezikshmërisë, sigurimit shëndetësor, transportit, mospajisjes më uniformë dhe procesit të avancimit”, thuhet në dorëheqjen e njërit prej policëve që e ka lexuar Zeqiri në Komisionin parlamentar.

Sipas kryetarit të sindikatës, nëse nuk përmirësohen kushtet dhe nuk plotësohen kërkesat, atëherë mund të ketë dorëheqje të tjera dhe për këtë ai shton se nuk është arsye vetëm migrimi.

“Prej atyre që japin dorëheqje, ka që gjejnë punë edhe brenda vendit, aty ku iu sigurohet sigurimi shëndetësor, paga më e lartë… Nuk janë të gjithë që largohen jashtë vendit”.