Pesë kompanitë nga Kosova përmbyllin suksesshëm pjesëmarrjen në panairin “Biofach 2024” në Gjermani

Kompanitë nga Kosova: Agro-Florentina, A-D-E Group, Fungo, Agroproduct dhe Hit Flores, kanë përmbyllur suksesshëm pjesëmarrjen në panairin ndërkombëtar të industrisë ushqimore organike “Biofach 2024” që u mbajt në Nuremberg të Gjermanisë nga data 13 deri 16 shkurt 2024, përcjell albinfo.ch.

Pjesëmarrja e kompanive kosovare në këtë panair është mundësuar nga Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), që për kompanitë kosovare ka siguruar hapësirën ekspozuese prej 81 m2.

Shtandi ku kanë qenë të ekspozuara prodhimet e kompanive kosovare është vizituar nga pjesëmarrës të shumtë në këtë panair. Kompanitë tona kanë zhvilluar takime me përfaqësues kompanish nga vende të ndryshme të botës, blerës potencial dhe vizitorë të shumtë.

Kompanitë nga Kosova në këtë panair kanë arritur të nënshkruajnë kontrata të reja dhe presin që si rezultat i pjesëmarrjes në këtë panair të arrijnë marrëveshje bashkëpunimi dhe plasim të produkteve të tyre.