Kurti: Kosova, e palëkundur në rrugëtimin e saj me miqtë e aleatët amerikanë dhe evropianë

Kryeministri i Kosovës, Albin Kurti, ka deklaruar se Kosova ka qenë dhe do të mbetet e palëkundur në rrugëtimin e saj bashkë me miqtë e aleatët amerikanë dhe evropianë.

Ai, në pritjen e organizuar për 16-vjetorin e pavarësisë, ka thënë se Kosovës i kanë qëndruar aleatët pranë në ditët e vështira dhe në momente festive, teksa u shpreh se Kosova ka qenë bashkë me amerikanë e evropianë dhe këtë rrugë do ta vazhdojë edhe në të ardhmen, transmeton albinfo.ch.

“Sikur në ditët e çlirimit në qershor 1999, edhe në ditën e pavarësisë më 17 shkurt 2008, sikur edhe sot në ditëlindjen e 16-të të Kosovës sonë të pavarur, Kosovës i kanë qëndruar pranë miq e aleatë që udhëtuan bashkë me ne e krah nesh si në kohë të vështira, ashtu edhe në momente festive e përkujtime si sot. Si dikur më 1999, si më 2008, si sot më 2024 Kosova ka qenë, është dhe do të mbetet e palëkundur në rrugëtimin e saj bashkë dhe krahas me miq dhe aleatë amerikanë, që ndonëse nga përtej Atlantikut janë afër dhe evropianë të kontinentit tonë të përbashkët. Me miq dhe aleatë jemi më të fortë dhe të sigurt. Bashkë kemi ardhur deri këtu e bashkë do të vazhdojmë për të përparuar drejt aty ku jemi nisur, drejt BE-së dhe NATO-s”, ka thënë ai.