Borrell: Putinin do ta mbajmë përgjegjës për vdekjen e Navalnyt

Presidenti rus, Vladimir Putin, do të mbahet përgjegjës për vdekjen e udhëheqësit rus të opozitës, Alexei Navalny, ka thënë shefi i politikës së jashtme të Bashkimit Evropian, Josep Borrell.

Ai i bëri komentet pas një takimi që zhvilloi në Bruksel me të venë e tij, Yulia Navalnaya.

“Ne i shprehëm ngushëllimet më të thella të BE-së Yulia Navalnayas. Vladimir Putin dhe regjimi i tij do të mbajnë përgjegjësi për vdekjen e Alexei Navalnyt”, shkroi Borrell në platformën X, transmeton Albinfo.ch.

“Siç e tha edhe Yulia, Putini nuk është Rusi. Rusia nuk është Putin. Ne do të vazhdojmë mbështetjen tonë për shoqërinë civile të Rusisë dhe mediat e pavarura”, theksoi Borrell.

Opozitari më i zëshëm rus, Aleksei Navalny, vdiq të premten në një burg të Arktikut. Vdekja e tij e tronditi opozitën në mërgim të Rusisë, e cila, ashtu sikurse Perëndimi, drejtoi gishtin e fajit nga Kremlini./Albinfo.ch