Gjermani: Humbi jetën shtetasi i Maqedonisë nga plagët që mori gjatë një rrahjeje

Keystone EPA/JULIEN WARNAND

Raportohet se një shtetas 32 vjeç i Maqedonisë së Veriut është vrarë në Esen të Gjermanisë. Ai është rrahur për vdekje pas një zënke me dy shtetas të Eritreas, përcjell albinfo.ch.

Zënka është shndërruar në përleshje, në të cilën shtetasi maqedonas është goditur me një gjësend të mprehtë, njofton policia gjermane.

Një dëshmitar i ngjarjes i ka dhënë ndihmën e parë dhe ka tentuar ta ndihmojë të plagosurin, i cili veçmë ishte pa ndjenja, por fatkeqësisht nuk arriti ta shpëtonte.

Sipas njoftimit të policisë, 32-vjeçari nga Maqedonia e Veriut ka ndërruar jetë në spital, si pasojë e plagëve. Hetuesia gjermane tashmë ka ngritur kallëzim penal ndaj njërit prej dy personave të përfshirë në përleshje. Me kërkesë të prokurorisë publike në Esen, ai është dërguar para një gjyqtari, i cili i shqiptoi masën e paraburgimit, nën dyshime për vrasje.

Personi i dytë i përfshirë në përleshje është lënë në liri, ndërsa ende nuk dihen motivet e rrahjes me pasoja fatale.