USAID: Përkundër mosmarrëveshjeve me qeverinë, përkushtimi ndaj Kosovës nuk ndalet

Vjosa Osmani, FB

Ndihmësadministratorja e Agjencisë Amerikane për Zhvillim Ndërkombëtar (USAID), Erin E. McKee, thotë se përkundër mosmarrëveshjeve me qeveritë e “veçanta”, përkushtimi i USAID-it ndaj popullit të Kosovës do të mbetet i palëkundur.

“Edhe pse mund të përballemi me mosmarrëveshje apo sfida me qeveri të veçanta, përkushtimi ynë ndaj popullit të Kosovës mbetet i palëkundur dhe i qëndrueshëm”, ka thënë ajo në konferencën për media pas takimit që ka zhvilluar me presidenten Vjosa Osmani.

Ajo po ashtu ka bërë të ditur se dialogu mes Kosovës dhe Serbisë është rruga e vetme përpara.

“E ardhmja e Kosovës është brenda Evropës. Sekretari Blinken kohët e fundit përsëriti se dialogu i lehtësuar nga BE-ja është i drejtë dhe rruga e vetme përpara për Kosovën për të avancuar integrimin e saj me institucionet evropiane dhe euroatlantike. Siç kemi bërë në 25 vitet e fundit, USAID-i do të qëndrojë i palëkundur në partneritet me Kosovën për të siguruar që momenti drejt kësaj të ardhme të mos lëkundet, por të përshpejtohet dhe përfundimisht të vazhdojë”, ka deklaruar McKee.

Ajo shton se është e kënaqur me progresin e Kosovës dhe përparimin për krijimin e mundësive ekonomike për komunitetet, ndërkohë thekson se përkushtimi i USAID-it për të vazhduar punën me Kosovën në reformat e nevojshme do të vazhdojë.