Kosova e para sipas Raportit për Demokraci, Serbia e fundit

Pixabay: Ilustrim

Kosova është renditur e para në Ballkanin Perëndimor, ndërsa Serbia si e fundit. Kjo renditje ka dalë nga Raporti Vjetor i Demokracisë për vitin 2024, i publikuar nga Instituti suedez V-Dem.

Ky institut ka katër kategori të demokracisë, ku më e mira është ajo liberale, e dyta është demokracia elektorale, e treta është autokraci zgjedhore dhe e katërta është autokraci e mbyllur, raporton klankosova, përcjell Albinfo.ch.

Kosova, Mali i Zi dhe Maqedonia e Veriut janë në kategorinë e dytë, atë të “demokracisë zgjedhore”, ndërsa Shqipëria dhe Bosnjë e Hercegovina kanë mbetur në “zonën gri”, mes demokracive dhe autokracive.

Ndërsa, Serbia është konsideruar si një “autokraci zgjedhore” nga Instituti V-Dem që nga viti 2014.

Në raportin e këtij viti, Mali i Zi u bë një “demokraci zgjedhore” për herë të parë, ndërsa Maqedonia e Veriut u kthye në këtë kategori pasi ra në “zonën gri” vitin e kaluar, kurse Kosova është në këtë kategori që nga viti 2014.

Bosnjë e Hercegovina dhe Shqipëria, nga ana tjetër, kanë mbetur në “zonën gri demokratike”, që do të thotë se V-Dem nuk i konsideron rezultatet e tyre të demokracisë aq të larta sa të kategorizohen në “demokracitë elektorale”.

Instituti V-Dem ka thënë se Kosova renditet si e 62-ta nga 170 shtete në Indeksin e Demokracisë Liberale dhe mbetet vendi me rezultatin më të mirë ne Ballkanin Perëndimor.

Ndërsa, Mali i Zi është në vendin e 67, i ndjekur nga Shqipëria e cila është në vendin e 82, Maqedonia e Veriut në vendin e 89, Bosnja në vendin e 92 dhe Serbia në vendin e 107./Albinfo.ch