Hapen katër degë bankare serbe në afërsi të kufirit me Kosovën

Dinari

E ashtuquajtura “Zyrë për Kosovën në Qeverinë e Serbisë” ka njoftuar sot se Banka e Kursimeve Postare e Serbisë i ka ngritur katër degë të improvizuara në afërsi të vendkalimeve kufitare Jarinjë, Bërnjak, Konçul dhe Merdar, transmeton albinfo.ch.

Sipas njoftimit, ngritja e këtyre degëve është bërë me qëllim që të mundësohen pagesat me para të gatshme për klientët e saj nga Kosova, si dhe për të siguruar qasje sa më të afërt, arkë, ATM dhe shërbime të tjera bankare.

“Këto degë janë vendosur në lokacione sa më të afërta nga vendkalimet, duke qenë se një zgjidhje e tillë teknike është e vetmja e realizueshme në rrethanat që ndodhemi”, thuhet në njoftim.

Bëhet e ditur se nga e hëna, degët e sapokrijuara të kësaj banke do të jenë në dispozicion të qytetarëve çdo ditë pune dhe të shtunën nga ora 09:00 deri në 17:00.