BQK jep tri opsione se si mund të kryhen transferet e pagesave për qytetarët serbë në Kosovë

BQK

Banka Qendrore e Kosovës ia ka dërguar Bankës Popullore të Serbisë tri opsione se si mund të kryhen transferet e pagesave për qytetarët serbë në Kosovë, ndërsa është thënë se nuk kanë marrë ende përgjigje.

Media në Kosovë, duke u bazuar në burime brenda BQK-së, kanë raportuar se opsionet i janë dërguar edhe Bashkimit Evropian, transmeton albinfo.ch.

Si opsion i parë i propozuar nga BQK-ja është dhënë që BNS-ja t’i dërgojë si transfer mjetet në euro te BQK-ja direkt, e BQK-ja t’i shpërndajë nëpër llogari bankare të përfituesve në euro.

Opsioni i dytë është që BNS-ja t’i dërgojë si transfer mjetet në euro te një bankë ndërkombëtare, ku BQK-ja ka llogari, për shembull, “Deutsche Bundesbank”, e më pas BQK-ja i shpërndan nëpër llogari bankare të përfituesve në euro.

Dhe, opsioni i tretë kalon në nivel të bankave komerciale, sipas të cilit, njëra nga bankat komerciale që operon në Kosovë dhe Serbi zgjedhet si opsion. Sipas këtij opsioni, Serbia i dërgon si transfer ndërkombëtar mjetet në euro në një bankë komerciale të Kosovës dhe më pas banka e zgjedhur i shpërndan ato nëpër llogaritë e përfituesve në Kosovë në euro.