Aeroplani ushtarak i NATO-s që hodhi më së shumti bomba më 1999, ruhet në bazat ushtarake në Lituani

Ish-ministri i Punëve të Jashtme i Kosovës, Enver Hoxhaj, ka kujtuar 25-vjetorin e bombardimeve të NATO-s, duke publikuar një fotografi që, sipas tij, paraqet aeroplanin që hodhi më së shumti bomba mbi Serbinë.

“Ky aeroplan në fotografi ka qenë i përfshirë në bombardimet e NATO-s dhe është aeroplani që ka hedhur më së shumti bomba mbi Serbi, e tani ruhet në bazat ushtarake në Lituani. Përjetë falënderues ndaj SHBA-së dhe Perëndimit për mbështetjen e vazhdueshme në rrugëtimin dhe shtetndërtimin tonë!”, ka shkruar ai në “Facebook”, transmeton albinfo.ch.

Ndryshe, sekretari i atëhershëm i NATO-s, Javier Solana, më 23 mars të vitit 1999, në orën 22:17, urdhëroi një sulm ajror mbi Republikën Federale të Jugosllavisë dhe sulmet ajrore nisën pa aprovimin e Këshillit të Sigurimit të Organizatës së Kombeve të Bashkuara.

Pas 78 ditëve sulme, bombardimet u ndërprenë më 10 qershor 1999, me Marrëveshjen Teknike të Kumanovës, e cila parashihte tërheqjen e të gjitha forcave ushtarake dhe policore serbe nga Kosova.