Ambasadori gjerman: Marrëveshja e Brukselit të zbatohet si e plotë

Foto Twitter: @GermanAmbKOS

Ambasadori i Gjermanisë në Kosovë, Jorn Rohde, ka thënë se Marrëveshja e Brukselit dhe Aneksi i Ohrit duhet të zbatohen plotësisht.

Përmes një postimi në rrjetin social “Twitter”, Rohde ka thënë se moszbatimi i plotë i tyre e dëmton procesin e dialogut midis Kosovës dhe Serbisë, transmeton albinfo.ch.

“Plotësisht dakord. Marrëveshjet e Brukselit/Ohrit kanë nevojë për zbatim të plotë. Mosbërja e tij dëmton procesin e dialogut”, ka shkruar ai, duke shpërndarë postimin e bashkëthemeluesit të Nismës Evropiane të Stabilitetit (ESI), Gerald Knaus, i cili ka thënë se Serbia nuk mund ta injorojë një marrëveshje, në të cilën është zotuar se nuk do ta kundërshtojë anëtarësimin e Kosovës në organizata ndërkombëtare.

“Serbia nuk mund të injorojë një marrëveshje ku u zotua se s’do të kundërshtojë anëtarësimin e Kosovës në asnjë organizatë ndërkombëtare dhe pastaj të argumentojë se, për shkak të së njëjtës marrëveshje, Kosova duhet të bllokohet. Kjo thjesht dëmton procesin e dialogut. Serbia bën më mirë të kundërtën: ta respektojë Marrëveshjen e Brukselit/Ohrit”, ka shkruar ai, duke u shprehur se ish-kryeministrja serbe, Ana Bërnabiq, duhet ta ketë të qartë se procesi i dialogut dhe anëtarësimi i Kosovës në Këshillin e Evropës, janë dy çështje të ndara.

Fully agree. Brussels/Ohrid agreements need full implementation. Not doing it undermines the dialogue process. https://t.co/lpbgb433Uv

— Ambassador Jörn Rohde (@GermanAmbKOS) March 25, 2024