Policia e Kosovës shpall në kërkim të dyshuarit për vrasjet e një nate më herët në Prishtinë

Kosovo Police

Policia e Kosovës ka kërkuar ndihmën e qytetarëve për kapjen e dy të dyshuarve për vrasjen e dyfishtë në Kolovicë të Prishtinës.

“Njësiti i hetimeve të përgjithshme që operon në kuadër të Drejtorisë Rajonale të Policisë në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në arrestimin e personave të dyshuar. Personat e dyshuar Ahmet ( Ali)  Berisha dhe Naim (Ali)  Berisha kërkohen për veprën vrasje e rëndë që ka ndodhur mbrëmë. Ndonëse janë ndërmarrë një sërë veprimesh nga ana e policisë, kërkimi i vazhdueshëm, bastisja e disa lokacioneve etj., personat e dyshuar vazhdojnë të ndodhen në arrati, andaj për çdo informatë që mund të çojë në identifikimin e vendndodhjes së personave të dyshuar na kontaktoni direkt në:

E-mail: info@kosovopolice.com; Facebook: https://www.facebook.com/KosovoPolice/; Android #app: Lajmero Policine; Tel: 192”, thuhet në shpalljen e Policisë së Kosovës.

Dy persona kanë vdekur dhe dy janë plagosur nga të shtënat me armë zjarri mbrëmjen e së martës në Prishtinë. Viktima është një 30-vjeçar, i cili u qëllua për vdekje dhe pasditen e së mërkurës nga plagët e marra ka vdekur një 48-vjeçare që ishte kalimtare e rastit në vendin ku ndodhi shkëmbimi i zjarrit.