SHBA mirëpret qeverinë e re palestineze

Shtetet e Bashkuara të Amerikës kanë mirëpritur formimin e një qeverie të re të autonomisë palestineze, duke sinjalizuar se po pranon përbërjen e rishikuar të kabinetit si një hap drejt reformës politike palestineze, raporton Associated Press, përcjell albinfo.ch.

Administrata Biden ka bërë thirrje për “rigjallërimin” e Autoritetit Palestinez me bazë në Bregun Perëndimor me shpresën se ai mund të administrojë gjithashtu Rripin e Gazës pasi të përfundojë lufta Izrael-Hamas, transmeton Klankosova.tv.

Në një deklaratë të premten vonë, AP raporton se zëdhënësi i Departamentit të Shtetit të ShBA-së, Matthew Miller, tha se ShBA pret të punojë me grupin e ri të ministrave “për të ofruar reforma të besueshme”.

“Një AP e rigjallëruar është thelbësore për të dhënë rezultate për popullin palestinez si në Bregun Perëndimor, ashtu edhe në Gaza dhe për krijimin e kushteve për stabilitet në rajonin më të gjerë”, tha Miller.

Autoriteti Palestinez administron pjesë të Bregut Perëndimor të pushtuar nga Izraeli. Ajo drejtohet nga presidenti palestinez, Mahmud Abbas, i cili nuk është përballur me zgjedhje për gati dy dekada.