Kryeministri i Kosovës paralajmëron se autortietet po përgatiten që Serbia të akuzohet për krime lufte

Kryeministri i Kosovës, Albin Kurti, ka deklaruar se autoritetet po përgatiten që Serbia të akuzohet, për krimet e kryera gjatë luftës në Kosovë.

Kurti ka thënë se i ka kërkuar Prokurorisë së Shtetit që të punojë maksimalisht që personat përgjegjës për krime gjatë luftës, për të cilët ka dëshmitarë të gjallë, të ndiqen penalisht dhe të dënohen, transmeton albinfo.ch.

“Edhe Ministria e Drejtësisë edhe këshilltarët e mi ligjorë, edhe me ekspertët ndërkombëtarë, janë duke bërë përgatitjet që të akuzohet Serbia si shtet përgjegjës për krimet e kryera gjatë luftës në Kosovë, e që janë krime luftime, krime kundër njerëzimit dhe gjenocid”, tha Kurti gjatë homazheve në Drenas, duke shtuar se ky proces po vazhdon dhe kur të ketë diçka konkrete publiku do të njoftohet me kohë, shkruan Radio Evropa e Lirë.

Ndryshe, Kurti edhe më herët pati deklaruar se Kosova synon të padisë Serbinë për gjenocid, për periudhën e luftës së fundit në shtet. Më 2021, ai kishte deklaruar se një padi e tillë do të ngrihej pranë Gjykatës Ndërkombëtare të Drejtësisë (GJND).

Sipas Fondit për të Drejtën Humanitare, në luftën e fundit në Kosovë më 1998/99 janë vrarë rreth 13.500 persona.