Çmimet e arit shënojnë rekord të ri

(KEYSTONE/Martin Ruetschi)

Çmimet e arit vazhduan rritjen dhe arritën një nivel tjetër rekord, të nxitura nga pritjet për uljen e normave të interesit në SHBA dhe interesi për metalin, si aset i sigurt.

Vëzhguesit e tregut presin që Rezerva Federale e SHBA-së të ulë normat në maj ose qershor.

Treguesi kryesor i inflacionit të Fed për shkurt, u rrit me 2.8% në vit, dhe ka të ngjarë të mbajë Bankën qendrore të SHBA-së në pritje, përpara se të fillojë të shqyrtojë uljen e normave të interesit.

Fed u ndal në normat e interesit në përfundim të takimit të fundit të marsit, por i qëndroi parashikimit për tri ulje të normave të interesit këtë vit.

Çmimet e arit priren të ndajnë një marrëdhënie të anasjelltë me normat e interesit. Ndërsa normat e interesit bien, ari bëhet më tërheqës në krahasim me aktivet me të ardhura fikse, si obligacionet, të cilat do të jepnin kthime më të dobëta në një mjedis me norma të ulëta interesi.

Çmimet e arit u nxitën gjithashtu nga kërkesa jashtë shtetit, sipas Caesar Bryan, menaxher i portofolit në kompaninë e menaxhimit të investimeve Gabelli Funds.

“Në Kinë investitorët privatë janë tërhequr nga ari, sepse sektori i pasurive të paluajtshme ka ecur keq”, tha Bryan, duke shtuar se ekonomia e përgjithshme e Kinës ka mbetur e dobët dhe bursa dhe monedha e saj, nuk kanë performuar mirë.

Rritja e arit deri më tani është nxitur nga blerjet e fuqishme nga bankat qendrore të botës, në një përpjekje për të diversifikuar portofolet e rezervave, për shkak të rreziqeve gjeopolitike, inflacionit të brendshëm dhe dobësisë së dollarit amerikan, tha Cavatoni nga Këshilli Botëror i Arit.

Kina është nxitësi kryesor si për kërkesën e konsumatorëve, ashtu edhe për blerjet e arit nga banka qendrore. / CNBC