Kurti, homazhe në Kralan të Gjakovës: Vrasja e fëmijëve e foshnjave, akt mizor

Me masakrën e Kralanit u vranë dhe ekzekutuan 80 civilë shqiptarë, ndërsa në familjet Vejsa, Caka e Haxhiavdyli mbi 29 civilë shqiptarë, në mesin e të cilëve edhe fëmijë

Kryeministri i Kosovës, Albin Kurti, bëri homazhe në Kralan të Gjakovës dhe në varrezat e qytetit në Gjakovë, duke nderuar të rënët e Kralanit dhe ata të familjeve Vejsa dhe Haxhiavdyli e Caka në Gjakovë.

“Vrasja e fëmijëve dhe foshnjave, e pleqve dhe plakave, e grave dhe civilëve të pambrojtur në pranverën e vitit 1999, në Kralan dhe në Gjakovë, dëshmon gjenocidin e ushtruar të forcave serbe ndaj shqiptarëve në Kosovë”, tha me këtë rast Kurti, i cili ishte i shoqëruar edhe nga disa prej ministrave të kabinetit të tij.

Tutje kryeministri i Kosovës tha se urdhërdhënësit kanë qenë dora e zgjatur e Millosheviqit, të cilët janë me dhjetëra e me qindra, andaj ata duhet të përgjigjen para drejtësisë, shkruan albinfo.ch.

“Me kodin e procedurës penale dhe plotësim ndryshimin, ne, kemi mundësuar që kriminelët serbë të përndiqen, të gjykohen dhe të dënohen qoftë edhe në mungesë”, tha Kurti.

Me masakrën e Kralanit u vranë dhe u ekzekutuan 80 civilë shqiptarë, ndërsa në familjet Vejsa, Caka e Haxhiavdyli mbi 29 civilë shqiptarë, në mesin e të cilëve edhe fëmijë.

Presidentja e Kosovës, Vjosa Osmani, ka përkujtuar 25-vjetorin e masakrës në shtëpinë e familjes Vejsa, gjersa theksoi se djegia e fëmijëve të Kosovës për së gjalli është e vërteta e Serbisë.

Osmani thekson se emrat e fëmijëve dhe grave martire të familjeve Vejsa, Caka, Haxhiavdija, Nuqi, Hoxha dhe Gashi nga Gjakova janë kujtim i përhershëm dhe dëshmojnë rrugën e vështirë të aspiratave tona për liri e shtet.

“25-vjet më parë, regjimi gjenocidal serb, egërsinë e manifestoi kur vrau e pastaj dogji në bodrumin e shtëpisë së familjes Vejsa anëtarët e këtyre familjeve nga mosha 2 e deri në atë 75 vjeçe. Djegia e fëmijëve të Kosovës për së gjalli është e vërteta e Serbisë, e cila edhe sot vazhdon t’i mbrojë kriminelët që kryen këto krime makabre me qëllim të qartë gjenocidal. Duke mbajtur gjallë kujtimin për ta, do ta vazhdojmë betejën për drejtësi”, shkruan presidentja.

 

---