Bislimi: Kosova u pajtua me propozimin e BE-së për dinarin, Serbia kërkon kohë shtesë

Në një deklaratë për media kryenegociatori i Kosovës, Besnik Bislimi, ka thënë se Kosova është pajtuar me propozimin e emisarit të Bashkimit Evropian, Miroslav Lajçak, sa i përket çështjes së dinarit, ndërsa Serbia ka kërkuar kohë shtesë.

Ai ka thënë pas takimit në Bruksel se është propozuar takim i radhës pas dy javëve.

Të enjten u takuan kryenegociatorët e Kosovës dhe Serbisë për të diskutuar rreth çështjes së dinarit.

Kryenegociatori serb, Petar Petkoviq, ka thënë se s’ka pasur marrëveshje. Ishte takimi i katërt për një muaj rreth kësaj çështjeje.

Zëvendëskryeministri i Kosovës ka thënë se janë pajtuar me propozimin e Lajçakut, ndërsa Serbia nuk ishte e gatshme të bënte kompromis.

“Ky takim është caktuar me idenë që palët të reflektojnë, gjegjësisht pala serbe ka kërkuar më shumë kohë, për arsye se nuk kanë pasur kompetenca në vendimmarrje. Javën e kaluar i është bërë e qartë palës serbe se takimi i radhës mund të mbahet vetëm nëse vijnë me ide për kompromis. Fatkeqësisht, edhe sot kemi pasur dallime të mëdha. Përderisa pala kosovare ka diskutuar për opsionet me të cilat qytetarët serbë mund të marrin mbështetje financiare edhe më tej nga Serbia, pala serbe ka vepruar si avokate e Bankës së Postës serbe dhe gjithë kohës kanë diskutuar se si të rregullohet licencimi i kësaj banke, e cila nuk është as kompetencë e as interes e palëve të përfshira. Duke parë pamundësinë e arritjes së një kompromisi, Lajçaku ka nxjerrë një propozim të konsoliduar, për të cilin ne besojmë se është propozim konstruktiv dhe në rrugën e duhur për të gjetur zgjidhje, e cila më së shumti u shkon përshtati qytetarëve serbë në Kosovë, por në të njëjtën kohë respekton Rregulloren e BQK-së”, ka thënë Bislimi pas takimit.