BE-ja hesht për themelimin e ekipit të Serbisë për të parandaluar anëtarësimin e Kosovës në KiE

Kreshnik Ahmeti, FB

Edhe pasi presidenti i Serbisë, Aleksandar Vuçiq, ka formuar ekipin për të parandaluar anëtarësimin e Kosovës në Këshillin e Evropës, zëdhënësi i BE-së, Peter Stano, ka hezituar të thotë se një sjellje e tillë e Beogradit shkel marrëveshjen për normalizimin e raporteve.

Një artikull i asaj marrëveshjeje e thotë qartë se Serbia nuk do ta kundërshtojë anëtarësimin e Kosovës në asnjë organizatë ndërkombëtare.

“Nuk dua të hyj në komente të asaj se çfarë ka thënë dhe çfarë dëshiron të bëjë presidenti Vuçiq. Unë mund të përsëris se bazuar në pritjet e Bashkimit Evropian, si Serbia, ashtu edhe Kosova pa vonesa duhet të nisin të implementojnë marrëveshjen për të cilën ishin pajtuar para më shumë se një viti në Ohër. Kjo është me rëndësi të madhe. Kur është fjala te Këshilli i Evropës, çështjet e anëtarësimit i takojnë Këshillit të Evropës. Nëse ata dështojnë, apo nëse vazhdojnë të dështojnë në implementimin  e asaj për çfarë janë pajtuar, kjo do të ketë pasoja serioze. Këto pasoja janë të lidhura me integrimin e tyre në BE”, ka thënë zëdhënësi i BE-së për Politikë të Jashtme dhe Siguri, Peter Stano.

Pas dhjetë ditësh pritet që Asambleja e Përgjithshme e Këshillit të Evropës të votojë për dhënien e pëlqimit për anëtarësimin e Kosovës në këtë organizatë. Për të kaluar ky vendim duhet dy të tretat e votave në këtë Asamble.

Pastaj vendimin formal për të pranuar Kosovën e miratojnë ministrat e jashtëm të vendeve anëtare në takimin e tyre në muajin maj, duke vendosur po ashtu me shumicën prej dy të tretave. Serbia tash thotë se do të angazhohet për të “luftuar si asnjëherë më parë për ta parandaluar këtë”.