Dorëhiqen nga komisionet komunale zgjedhore në veri anëtarët e Listës Serbe

Keystone EPA/GEORGI LICOVSKI

Sot, anëtarët e komisioneve komunale zgjedhore në veri nga radhët e Listës Serbe kanë dhënë dorëheqje.

Komisioni Qendror i Kosovës e ka konfirmuar lajmin për KOHËN, duke thënë se ky institucion i ka funksionalizuar komisionet komunale të zgjedhjeve në veri në mbledhjet e kaluara, duke i caktuar katër zyrtarë ekzekutivë, transmeton albinfo.ch.

“Mund t’jua konfirmoj se kemi pranuar dorëheqjet nga katër anëtarët e Komisioneve Komunale të Zgjedhjeve për komunat Leposaviq, Zveçan, Zubin Potok dhe Mitrovicë e Veriut, të cilët janë emëruar më parë nga KQZ si përfaqësues të subjektit politik Lista Serbe. Në mbledhjet e kaluara, KQZ ka funksionalizuar Komisionet Komunale të Zgjedhjeve në këto katër komuna, duke caktuar 4 Zyrtarët Ekzekutiv, të cilët njëkohësisht janë kryesues të KKZ-së si dhe ka marrë vendim për emërimin e 27 anëtarëve, të cilë përfaqësojnë subjektet politike parlamentare”, ka thënë zëdhënësi i KQZ-së, Valmir Elezi.

Sipas Ligjit për Zgjedhjet e Përgjithshme, KKZ-ja administron zgjedhjet brenda komunës përkatëse, nën mbikëqyrjen ekskluzive dhe udhëzimet e KQZ-së.

Zyrtarët e Listës Serbe ishin emëruar nga Komisioni Qendror i Zgjedhjeve më 18 mars të këtij viti, ndërsa më 21 prill do të votohet për shkarkimin e kryetarëve shqiptarë në Mitrovicë të Veriut, Leposaviq, Zubin-Potok dhe në Zveçan.