Lajçak: Po punojmë për të gjetur zgjidhje për dinarin

Emisari i Bashkimit Evropian për dialogun Kosovë-Serbi, Miroslav Lajçak, thotë se po punon për të gjetur një zgjidhje për çështjen e dinarit.

“Nga Bosnja u ktheva në Bruksel për vazhdimin e përpjekjeve të Kosovës dhe Serbisë për të gjetur një mes në lidhje me të ashtuquajturën ‘çështje të dinarit’. Diskutuam një zgjidhje të mundshme të përkohshme për qytetarët e prekur nga vendimi i Bankës Qendrore të Kosovës për operimin me para të gatshme dhe besoj se ia dolëm ta ngushtojmë hendekun. Në të njëjtën kohë, disa dallime mbeten dhe për këtë arsye do të pres sërish dy kryenegociatorët në Bruksel dhe pres që bisedimet tona të bazohen në ide shumë konkrete, të cilat do të na mundësonin të ecim përpara në interes të popullit”, ka thënë ai.

Të enjten e javës së kaluar në Bruksel janë zhvilluar takime mes Lajçakut dhe dy kryenegociatorëve, por zgjidhje nuk ka pasur.