Poloni: Përurohet Konsullata e Përgjithshme e Kosovës

Foto FB: Donika Gërvalla-Schwarz

Në Poloni është inauguruar Konsullata e Përgjithshme e Kosovës. Në ceremoni ishte e pranishme ministrja e Punëve të Jashtme dhe Diasporës, Donika Gërvalla.

Ajo e ka falënderuar Poloninë për mbështetjen e dhënë Kosovës, ndër vite.

“Polonia si një shtet mik, ka një potencial të madh të bashkëpunimit ekonomik në eksport dhe import, shkëmbim të studentëve, ekspertëve, përvojave në proceset integruese dhe ruajtjen e paqes dhe stabilitetit në rajon”, ka thënë ajo, transmeton albinfo.ch.

Në anën tjetër, ministrja polake, Moscicki-Dendys, përgëzoi Republikën e Kosovës për ceremoninë dhe shprehu vullnetin dhe përkushtimin e Polonisë për të intensifikuar marrëdhëniet bilaterale në fushat me interes të përbashkët.

Ministrja polake vlerësoi lart ndihmën e Kosovës për Ukrainën dhe orientimin e saj të qartë perëndimor, duke ofruar mbështetjen polake në shumë fusha, e sidomos në shtimin e lidhjeve ekonomike, kulturore dhe ndihmën në anëtarësimin e Kosovës në Këshill të Evropës dhe integrimin në BE,  thuhet në komunikatë.

Ndryshe, Ministria e Punëve të Jashtme e Polonisë më 8 nëntor 2022 kishte njoftuar se Qeveria e Polonisë ka lidhur marrëveshje me Qeverinë e Kosovës për vendosjen e marrëdhënieve konsullore.