Tre familjarë të plagosur në Pejë, njëri në gjendje të rëndë

Tre persona, familjarë mes vete, janë plagosur nga arma e zjarrit të mërkurën mbrëma në Pejë. Personi i dyshuar ndodhet në kërkim, teksa të plagosurit pas ndihmës mjekësore që kanë marrë në Spitalin e Pejës, janë nisur për QKUK –Prishtinë.

Zyra për Komunikim e Spitalit të Pejës konfirmoi për Gazetën Express se gjendja e njërit prej të plagosurve është e rëndë, transmeton Albinfo.ch.

Spitali i Pejës, konfirmoi se të plagosurve i është dhënë ndihma e nevojshme mjekësore.

“Janë të pranuar tek ne persona, janë duke ofruar ndihmën e nevojshme mjekësore, gjendja e njërit prej të plagosurve ëshntë e rëndë. Tre personat e plagosur janë nisur për në QKUK”, thuhet në përgjigjen e spitalit.

Prokurori kujdestar në Prokurorinë Themelore të Pejës, Ersan Qavolli tha se tre personat që u plagosën sonte në Pejë janë familjarë të afërt mes vete.

Personi i dyshuar për këtë ngjarje “ndodhet në kërkim intensiv”, tha prokurori Qavolli.

“Ka ndodh një tentim vrasje e rëndë, kemi dalë menjëherë ne vendin e ngjarjes bashkë me hetuesit, janë tre persona të plagosur dhe jemi në kërkim të personit të dyshuar”, tha prokurori Qavolli.

Ai tha se policia ndodhet në vendin e ngjarjes dhe është duke i siguruar të gjitha provat./Albinfo.ch/