Fluturimi Doha-Dublin: 12 persona të lënduar si pasojë e turbulencave

(KEYSTONE/Christian Beutler)

Një avion pasagjerësh ka hasur në turbulenca të forta në hapësirën ajrore turke. Sipas deklaratës nga Aeroporti i Dublinit, 12 persona në bordin e aeroplanit të Qatar Airways kanë mbetur të lënduar.

Gjashtë nga të prekurit thuhet se janë anëtarë të ekuipazhit, ndërsa të tjerët ishin pasagjerë.

Tetë persona u desh të dërgoheshin në spital pasi mbërritën në kryeqytetin irlandez. Sipas Qatar Airways, lëndimet ishin të lehta. Linja ajrore tha se incidenti tani po hetohet nga brenda.

Avioni po udhëtonte nga Doha në Dublin. “Fluturimi i Qatar Airways QR107 nga Doha u ul i sigurt në Aeroportin e Dublinit në orën 13:00 të së dielës”, thuhet në një deklaratë nga aeroporti përmes rrjetit social “Twitter”, transmeton albinfo.ch.

Pasagjerët raportuan një rënie të papritur në aeroplan që zgjati rreth 20 sekonda. Në atë kohë shpërndaheshin ushqime.

Vetëm pak ditë më parë, një person vdiq dhe dhjetëra të tjerë u plagosën kur një aeroplan i Singapore Airlines hasi në turbulenca të forta gjatë rrugës nga Londra në Singapor./SRF