Pasi u shpall fajtor, Trump mbledh mbi 50 milionë dollarë donacione

Keystone (AP Photo/Paul Sancya)

Ekipi i fushatës së Donald Trump njoftoi se kishte mbledhur më shumë se 50 milionë dollarë donacione në internet, 24 orë pas dënimit të tij penal duke theksuar se vendimi e kishte galvanizuar mbështetjen e tij si kurrë më parë.

“Kjo është më shumë se dy milionë dollarë në orë”, tha ekipi i tij i fushatës në një deklaratë.

”Brenda disa minutave nga shpallja e vendimit, sistemi ynë digjital i mbledhjes së fondeve u mbyt nga mbështetja dhe, me gjithë vonesat e përkohshme në lidhje me pjesëmarrjen në internet, Trump mblodhi 34,8 milionë dollarë përmes sasive të vogla”, thanë në një deklaratë këshilltarët e fushatës, Chris LaCivita dhe Susie Wiles, sot në mëngjes.

Që nga e premtja në mbrëmje, shifra arriti në 52,8 milionë dollarë, një shumë marramendëse.

Vetëm shifra e mëngjesit përfaqëson pothuajse dyfishin e ditës më të mirë të mbledhjes së fondeve për fushatën në WinRed, platformën zyrtare të donacioneve të Partisë Republikane.

Dhe 30% e këtyre donacioneve janë bërë nga donatorë të rinj.

“Joe mashtruesi dhe demokratët, me gjuetinë e tyre të shtrigave, kanë zgjuar lëvizjen MAGA (“Make America Great Again” slogani i Donald Trump – shën. i përkth.) si kurrë më parë”, përshëndetën edhe një herë këshilltarët e fushatës.