Gjermania, Franca e Polonia, më të prekurat nga dezinformimi rus

Gjermania, Franca dhe Polonia kanë qenë kohët e fundit objektivat kryesore të ndërhyrjes ruse për sa i përket dezinformimit.

Propaganda është përshtatur me specifikat e vendeve individuale, duke u fokusuar, për shembull, në Francë në Lojërat Olimpike, në Gjermani në emigracionin dhe sigurinë dhe në Poloni, në një ”pushtim” të mundshëm të refugjatëve ukrainas.

”Dezinformimi ka forma të ndryshme, nga deepfakes të bazuara në inteligjencën artificiale e deri te njoftimet e rreme, si ato të mobilizimit ushtarak”, theksoi nënkryetarja e Komisionit të BE-së, Vera Jourova, gjatë takimit me një grup të Google, Youtube, X, Meta dhe TikTok.

”Alarmi në Evropë për ndërhyrjen ruse në zgjedhjet evropiane është maksimal. Frika është se ka të ashtuquajtura ndërhyrje të minutës së fundit: janë të rrezikshme, sepse ka shumë pak kohë reagimi, në këto raste varësia nga mbrojtjet e vendosura nga platformat është pothuajse totale”, shpjegoi komisionerja.

Gjatë vizitës së saj në Kaliforni, Jourova përsëriti shqetësimet e BE-së për kërcënimin e dezinformimit dhe rolin e Rusisë në lajmet e rreme.

”Në TikTok, për shembull, shumica e informacionit të përhapur është i rremë”, vuri në dukje ajo.