Ndryshimet klimatike, OKB-ja paralajmëron pasoja të rënda nga “ferri i klimës”

Foto Ilustrim

Secili nga 12 muajt e fundit ka qenë më i nxehtë në krahasim me të njëjtët muaj në vitet e mëparshme, tha mbikëqyrësi i ndryshimeve klimatike të BE-së, ndërsa Sekretari i Përgjithshëm i OKB-së, Antonio Guterres bëri thirrje për veprim urgjent për të parandaluar “ferrin e klimës”.

Sipas shërbimit evropian “Copernicus”, temperatura mesatare globale në periudhën 12 mujore deri në fund të majit ishte 1,63 gradë Celsius mbi mesataren para-industriale, që është më e larta që nga fillimi i regjistrimeve në vitin 1940.

Kjo mesatare nuk do të thotë se bota ka tejkaluar pragun e ngrohjes globale prej 1.5 gradë Celsius në nivelin e vitit kalendarik. Shkencëtarët paralajmërojnë për pasoja më serioze dhe të pakthyeshme për klimën nëse kjo ndodh, raporton theguardian.

Në një raport të veçantë, Organizata Botërore Meteorologjike thotë se tani ka një shans 80 për qind që të paktën një nga pesë vitet e ardhshme të shohë një temperaturë mesatare që tejkalon përkohësisht nivelet para-industriale me 1.5 gradë Celsius.

Duke komentuar këto gjetje, Guterres theksoi se bota po lëviz me shpejtësi në drejtimin e gabuar dhe po largohet nga stabilizimi i sistemit klimatik.

“Gjatë vitit 2015, mundësia për një shkelje të tillë ishte afër zeros”, tha ai me rastin e Ditës Botërore të Mjedisit.

Ndryshe, Guterres bëri thirrje për një reduktim prej 30 për qind të prodhimit dhe përdorimit global të lëndëve djegëse fosile deri në vitin 2030.