BE-ja hap bisedimet për anëtarësim me Ukrainën e Moldavinë

pixabay

Shtetet e Bashkimit Evropian zyrtarisht e kanë aprovuar nisjen e negociatave të anëtarësimit me Ukrainën dhe Moldavinë javën e ardhshme, një tjetër hap në rrugëtimin e gjatë të dy vendeve për t’iu bashkuar bllokut.

Belgjika, që kryeson BE-në, ka thënë se shtetet anëtare janë pajtuar për një kornizë negociuese, raportoi AP, përcjell albinfo.ch.

“Kjo hap rrugën për nisjen e negociatave të martën, më 25 qershor, në Luksemburg”.

Presidenti ukrainas, Volodymyr Zelensky, e ka quajtur këtë një “hap historik”.

“Miliona ukrainas dhe breza të popullit tonë po e realizojnë ëndrrën e tyre evropiane. Ukraina po kthehet në Evropë, ku e ka pasur vendin për shekuj, si anëtar i plotë i komunitetit evropian”, shkroi ai në X.

Liderët e Bashkimit Evropian patën rënë dakord vitin e kaluar që negociatat e pranimit të fillonin me të dyja shtetet.

Procesi mes fillimit të negociatave me Ukrainën dhe Moldavinë dhe anëtarësimit të tyre në BE mund të zgjasë shumë vjet.