Kancelari gjerman paralajmëron Netanyahun kundër spirales së dhunës

Një zhëdhënës i qeverisë në Berlin, Wolfgang Büchner ka njoftuar se sot kancelari gjerman, Olaf Scholz ka shprehur sot shqetësimin për rrezikun e një lufte rajonale në Lindjen e Mesme gjatë një bisede telefonike me kryeministrin izraelit Benjamin Netanyahu.

Biseda u zhvillua një ditë pas një sulmi ajror izraelit në një shkollë në Gaza, ku thuhet se vrau dhjetëra civilë, me Ministrinë e Jashtme gjermane që më vonë e quajti sulmin “të papranueshëm” dhe bëri thirrje për një armëpushim.

“Scholz i tha Netanyahut se qeveria gjermane dënon fuqishëm kërcënimet nga Irani, militantët e Hezbollahut në Liban dhe të tjerë kundër sigurisë së Izraelit dhe qytetarëve të tij”, ka deklaruar Büchner, transmeton albinfo.ch.

Sipas tij, kancelari theksoi nevojën për të “thyer spiralën shkatërruese të dhunës hakmarrëse, për të ulur tensionet dhe për të punuar në mënyrë konstruktive për de-përshkallëzimin”.

Scholz përsëriti gjithashtu se ka ardhur koha për të finalizuar një marrëveshje për një armëpushim në Gaza, dhe lirimin e pengjeve të mbajtura nga militantët në territorin palestinez.

Tutje ai ka thënë se shumë qëllime ushtarake në luftën kundër Hamasit janë arritur, por vuajtjet njerëzore në Rripin e Gazës vazhdojnë dhe janë “të mëdha”.

Më vonë të dielën, Ministria e Jashtme gjermane bëri thirrje përsëri për një armëpushim në Gaza.