A ka vend për panik nga lija e majmunit?

Keystone (AP Photo/Martin Mejia)

Përhapja e virusit “Mpox”, apo e njohur si lija e majmunit, përbën tashmë një emergjencë shëndetësore globale, njoftoi Organizata Botërore e Shëndetësisë. Ky virus është i përhapur gjerësisht në Afrikë, sidomos në Kongo. Por, së fundmi gjetja e një rasti në Suedi ka ngritur alarmin edhe në Evropë. Po kështu, edhe SHBA-ja ka ngritur alarmin shëndetësor. Autoritetet shëndetësore bëjnë thirrje për plan masash që të parandalohet përhapja.

“Mpox është një sëmundje, e cila manifestohet me një temperaturë të lartë të fillimit të papritur dhe të shoqëruar me skuqje të lëkurës. Ka gjithashtu ënjtje limfatike, të njohura si limfadenopati dhe gjithashtu ka simptoma të tjera të lidhura, duke përfshirë dhimbjen e kokës. Lija e majmunit transmetohet kryesisht me kontakt të drejtpërdrejtë nga një kafshë e sëmurë, me ose pa simptoma, te një person i shëndetshëm. Ka edhe transmetim nga i sëmuri tek i shëndoshi”, tha Dr. Tresor Basubi, Spitali i Përgjithshëm Niragongo.

“Ne kemi atë që na duhet për ta ndaluar mpox. Kjo nuk është e njëjta situatë me të cilën u përballëm në fillim të Covid-19, kur nuk kishte vaksina dhe ilaçe”, tha Kris Bearer, drejtor i Institutit për Shëndetin Global i Universitetit Duke. Në krahasim me koronavirusin, “mpox” përhapet shumë më ngadalë. Ndryshe nga pandemia e Covid-19, për “mpox” ka vaksina dhe trajtime me medikamente. 96% e rasteve me linë e majmunit janë të regjistruara në Kongo, një nga vendet më të varfra në botë.