Komisioni Evropian thekson rolin vendimtar të tunelit Gotthard

(KEYSTONE/Urs Flueeler)

Pas një mbylljeje njëvjeçare, tuneli bazë Gotthard u rihap për trafikun hekurudhor këtë javë.

Komisioni Evropian (KE) shfrytëzoi këtë mundësi për të nxjerrë në pah rëndësinë e këtij aksi veri-jug në rrjetin hekurudhor të kontinentit, duke vënë në dukje se rihapja e plotë e tunelit do të forcojë transportin hekurudhor midis Detit të Veriut dhe Mesdheut.

Megjithëse ndodhet tërësisht në territorin zviceran, tuneli është një korridor thelbësor transporti për tetë vende, përkatësisht Irlandën, Holandën, Belgjikën, Luksemburgun, Francën, Gjermaninë, Italinë dhe, natyrisht, Zvicrën, shkruan The Local, transmeton albinfo.ch.

Prandaj, rifillimi i operimeve në tunel “do të rrisë ndjeshëm kapacitetin e infrastrukturës hekurudhore përgjatë këtij korridori shumë të shfrytëzuar“, tha KE, duke shtuar se do të kontribuojë në efikasitetin, qëndrueshmërinë dhe integrimin e rrjeteve evropiane të transportit.