Këto janë profesionet me më së shumti punëtorë të huaj në Zvicër

Në profesionet e izolatorëve dhe suvatuesve, të huajt përbëjnë tre të katërtat (rreth 75%) ose edhe më shumë, të të gjithë të punësuarve

Përqindja e punëtorëve të huaj në Zvicër është rritur prej vitesh. Ata janë shpesh në shumicë në ndërtim dhe në disa profesione të caktuara, transmeton albinfo.ch.

Kështu, nëse në vitin 1991 kjo përqindje ishte 26 për qind, tani është pothuajse 34 për qind, shkruan “Tages-Anzeiger” duke iu referuar të dhënave të Entit Federal të Statistikave (BFS).

Tri të katërtat e tyre vijnë fillimisht nga shtetet e BE-së dhe EFTA-s. Rreth një të katërtën e mbetur e përbëjnë punëtorët nga vendet e treta. Shumica e të punësuarve të huaj, edhe jetojnë në Zvicër. Ndërsa rreth një e treta janë udhëtarë ndërkufitarë, kryesisht nga vendet fqinje.

Në disa punë, përqindja e punonjësve të huaj është veçanërisht e madhe. Kjo vlen veçanërisht për sektorin e ndërtimit.

Në profesionet e izolatorëve dhe suvatuesve, ata përbëjnë tre të katërtat ose edhe më shumë, të të gjithë të punësuarve, përcjell albinfo.ch. Edhe në punët e supozuara tipike zvicerane, siç është prodhimi i orëve, përqindja e të huajve është më e lartë se mesatarja prej 34 për qind.

Për shkak se shumë të huaj punojnë në punë me paga të ulëta, nuk është për t’u habitur që pagat e tyre janë mesatarisht 15 për qind më të ulëta se pagat e shtetasve zviceranë.

Përqindja më e ulët e të punësuarve të huaj, në polici

Njerëzit me pasaportë zvicerane kryesisht punojnë në punë ku trajnimi specifik ose njohuritë lokale janë një kërkesë ose një avantazh, siç thuhet më tej në artikull. Për shembull, ka fare pak avokatë të huaj. Megjithatë, përqindja e të huajve është më e ulëta në polici.

 

---