Mijëra protestues në Valencia për reagimin ndaj përmbytjeve

Keystone (AP Photo/Alberto Saiz)

Dhjetëra-mijëra njerëz marshuan të shtunën në qytetin juglindor spanjoll të Valencias për trajtimin e autoriteteve ndaj përmbytjeve shkatërruese.

Mbi 220 njerëz u vranë në përmbytjet, të cilat ishin më vdekjeprurësit në Evropë në dekada.

Një grup i vogël protestuesish u përleshën me policinë përpara Bashkisë së Valencias në fund të marshimit dhe policia përdori shkopinj për t’i larguar ata.

Sipas autoriteteve rajonale, rreth 130,000 njerëz morën pjesë në protestën në Valencia. Demonstrata u organizuan edhe në një numër qytetesh të tjera spanjolle.

Protestuesit kërkuan dorëheqjen e liderit të qeverisë rajonale të Valencias, Carlos Mazon, i cili i përket Partisë Popullore të opozitës konservatore dhe kryeministrit spanjoll, Pedro Sanchez, të socialistëve në pushtet.

Disa protestues bërtisnin “vrasës” dhe akuzuan drejtuesit si përgjegjës për numrin e lartë të vdekjeve.

Protesta vjen disa ditë pasi banorët e Valencias brohoritën “vrasës” dhe hodhën baltë mbi Mazon dhe Mbretin e Spanjës Felipe VI.

Banorët në zonat e prekura akuzuan Mazon për lëshimin e alarmit shumë vonë, pasi përmbytjet kishin filluar tashmë.

Pas disa ditësh paralajmërime për stuhi nga shërbimi kombëtar i motit, duke filluar nga 25 tetori, disa bashki dhe organizata ngritën alarmin përpara se ta bënte qeveria rajonale. Universiteti i Valencias i tha stafit të tij më 28 tetor që të mos vinin në punë dhe disa bashki në rajon u thanë njerëzve të shkonin në shtëpi.

Nga 220 vdekjet e konfirmuara deri më tani, 212 prej tyre u vranë në rajonin e Valencias. Tetë të tjerët u vranë në rajonet fqinje të Castile-La Mancha dhe Andaluzisë.

Afro 80 persona janë ende të zhdukur pas përmbytjes dhe kërkimet për mbetjet po vazhdojnë.

Bordi rajonal i shëndetësisë nuk ka raportuar asnjë shpërthim të sëmundjeve infektive ose një kërcënim të madh për shëndetin publik.

Përmbytjet janë më vdekjeprurësit në Evropë që nga përmbytjet në Portugali që vranë rreth 500 njerëz në vitin 1967./DW