Caktohen prioritetet e agjendës “Shëndetësia2020”

Për vitin 2015 EDI ka definuar dhjetë prioritete, gjegjësisht katër mesazhe, tri strategji dhe tre raporte, lidhur me të cilat do të vendosë Këshilli Federal

Ministri Alain Berrset, në resorin e të cilit bën pjesë edhe shëndetësia, ka informuar qeverinë e vendit mbi përparimet e agjendës së politikës shëndetësore “Gesundheit2020” (Shendetësia2020). Në vitin 2014 janë zbatuar ose janë në rrugë drejt përfundimit 12 projekte prioritare. Për vitin 2015 Departamenti i Brendshëm (EDI) ka miratuar dhjetë prioritete.

Në kuadrin e strategjisë së përgjithshme “Gesundheit2020”, deri në vitin 20120 do të jetësohen rreth 36 masa që sigurojnë kualitetin jetësor, forcojnë barazinë e shanseve etj.

Për vitin 2015 EDI ka definuar dhjetë prioritete, gjegjësisht katër mesazhe, tri strategji dhe tre raporte, lidhur me të cilat do të vendosë Këshilli Federal: Mesazhi për rishikimin e pjesshëm të Ligjit Federal mbi sigurimin shëndetësor, për udhëheqjen më efikase të sistemit ambulantor ; Mesazhi mbi ligjin federal për forcimin e kualitetit dhe ekonomizimin e sigurimit obligativ shëndetësor; Mesazhi për Ligjin Federal mbi prodhimet e duhanit; Mesazhi për Ligjin Federal mbi profesionet mjekësore; Strategjia Nacionale mbi rezistencën antibiotike; Strategjia Nacionale mbi mbikëqyrjen, preventivën dhe luftimin e infeksioneve nosokomiale; Strategjia Nacionale mbi varshmëritë; Raporti lidhur me forcimin e të drejtave të pacientëve; Raporti mbi masat për shëndetin mental në Zvicër; Raporti mbi përkujdesjen shëndetësore afatgjatë

Gjatë vitit 2014 Janë përmbushur 12 prioritete të përcaktuara. Sipas njoftimit të EDI, qeveria ka realizuar prioritetet si mesazhi për Ligjin Federal mbi Regjistrimin e të sëmurëve nga kanceri, mesazhin mbi Qendrën për Cilësi në sigurimin shëndetësor të detyruar etj.

Projektet e Strategjisë “Gesundheit2020” do të përpunohen në bashkëpunim të ngushtë me partnerët në sferën e politikës së shëndetësisë.

Agjenda “Gesundheit2020” është lansuar në vitin 2013 nga Këshilli Federal, me qëllim përmirësimin e sistemit shëndetësor të Zvicrës.