Frika nga sulmet ruse, SHBA mbyll ambasadën në Kiev të Ukrainës

Shtetet e Bashkuara të Amerikës kanë mbyllur ambasadën e tyre në Kiev mes shqetësimeve për një sulm të mundshëm rus.

Ambasada tha sot në një postim se kishte marrë informacion specifik për një sulm të mundshëm të rëndësishëm ajror më 20 nëntor.

“Për më shumë kujdes, Ambasada do të mbyllet dhe punonjësit e Ambasadës po udhëzohen të strehohen në vend”, thuhet në mesazh.

Ambasada rekomandoi qytetarët amerikanë në Kiev të strehoheshin menjëherë në rast se shpallej një alarm ajror.

Paralajmërimi vjen një ditë pasi Kievi shënoi ditën e 1000-të – që kur Rusia nisi pushtimin e saj në shkallë të plotë në shkurt 2022, dhe ndërsa Uashingtoni vendosi të lejonte Ukrainën të përdorte raketat ATACMS kundër objektivave brenda territorit rus.

Sipas raporteve të medieve amerikane, presidenti në largim, Joe Biden, lejoi Kievin të godasë objektivat në Rusi me armë amerikane – në përgjigje të dislokimit të ushtarëve koreano-veriorë në Moskë.

Rusia tha se e sheh masën si një përshkallëzim dhe një “përzierje” të Shteteve të Bashkuara të Amerikës dhe vendeve të tjera perëndimore në luftë.

Ambasada amerikane lëshon rregullisht paralajmërime për sulme të mëdha ajrore, përfshirë në mars dhe gusht të këtij viti, por mbyllja e saj përfaqëson një masë të jashtëzakonshme.