Nga 1 janari, Rumania e Bullgaria bëhen pjesë e hapësirës Shengen

Ky vendim do të hyjë në fuqi më 1 janar 2025

Ministrat e brendshëm evropianë u takuan në Bruksel të enjten dhe vendosën të lejojnë Bullgarinë dhe Rumaninë të hyjnë në zonën Shengen, duke hequr kufijtë midis dy vendeve dhe pjesës tjetër të Evropës.

Ministrat e Brendshëm të Bashkimit Evropian kanë vendosur të autorizojnë anëtarësimin e dy vendeve të Evropës Lindore në hapësirën e lëvizjes së lirë Shengen. Austria, vendi i fundit që kundërshtoi vendimin, hoqi tani dorë nga vetoja ndaj këtij vendimi.

Ky vendim do të hyjë në fuqi më 1 janar 2025.

“Është një moment historik për të mirëpritur përfundimisht Bullgarinë dhe Rumaninë”, deklaroi ministri i Brendshëm hungarez, Sandor Pinter, i cili mban Presidencën e radhës të Bashkimit Evropian.

Procesi kishte nisur që në mars, kur u hoqën kontrollet e pasaportave në kufijtë ajrorë dhe detarë të këtyre vendeve me vendet e tjera të BE-së.

 

---