Valët e të nxehtit, përmbytjet dhe ciklonet ndërpresin shkollën për miliona njerëz

Një raport i publikuar nga UNICEF të premten zbuloi se rreth 242 milionë fëmijë në 85 vende u prekën nga ndërprerja e arsimit për shkak të kushteve ekstreme të motit  gjatë vitit 2024.

Sipas raportit, një në shtatë nxënës nuk mund të shkonin në shkollë për shkak të valëve të të nxehtit, përmbytjeve, cikloneve dhe kushteve të tjera ekstreme të motit.

Viti i kaluar ishte më i nxehti i regjistruar, me vitet e fundit kur temperaturat mesatare globale kaluan përkohësisht pragun kritik të ngrohjes prej 1.5 gradë Celsius.

Sipas raportit, valët e të nxehtit kanë prekur të paktën 171 milionë fëmijë. Vetëm në prill, temperaturat u rritën në Bangladesh, Kamboxhia, Indi, Tajlandë dhe Filipine, duke goditur 118 milionë fëmijë.

Më vonë në shtator, fillimi i vitit akademik përkoi me tajfunin shkatërrues Yagi, i cili goditi Azinë Lindore dhe Paqësorin.

Por rajoni më i goditur ishte Azia Jugore, ku u prekën 128 milionë fëmijë shkollorë. Shumica, 54 milionë, ishin në Indi. Shumica e tyre u goditën nga valët e të nxehtit, të cilat prekën edhe 35 milionë në Bangladesh.

Mbi 400 shkolla u shkatërruan nga përmbytjet në Pakistan në prill, ndërsa në Afganistan, valët e të nxehtit të ndjekura nga përmbytjet e mëdha në maj shkatërruan mbi 110 shkolla.

Raporti vlerëson se gati 74% e fëmijëve të prekur ishin të vendosur në vendet me të ardhura të mesme dhe të ulëta.

Muaj të thatësirës në Afrikën jugore, të përkeqësuar nga El Nino, kërcënuan shkollimin dhe të ardhmen e miliona fëmijëve. Cikloni Chido dhe stuhia tropikale Dikeledi lanë territorin francez të Mayotte në gërmadha dhe shkatërruan mbi 330 shkolla në Mozambik, duke ndërprerë rëndë arsimin.

Catherine Russell, drejtoresha ekzekutive e UNICEF-it, theksoi se arsimi ishte ndër shërbimet që ndërpriten më shpesh nga rreziqet klimatike.

“Megjithatë shpesh anashkalohet në diskutimet e politikave,” paralajmëroi ajo. “E ardhmja e fëmijëve duhet të jetë në krye të të gjitha planeve dhe veprimeve që lidhen me klimën.”

Russel gjithashtu theksoi se fëmijët ishin “më të prekshëm” ndaj motit ekstrem.

“Ata nxehen më shpejt, djersitin me më pak efikasitet dhe ftohen më ngadalë se të rriturit”, tha ajo në një deklaratë.

“Fëmijët nuk mund të përqendrohen në klasa që nuk ofrojnë pushim nga nxehtësia e madhe dhe ata nuk mund të shkojnë në shkollë nëse shtegu është i përmbytur ose nëse shkollat ​​shpërthehen.”/DW

---