Vlerësimi i CIA-s për origjinën e koronavirusit

Raportohet se rishikimi u urdhërua në javët e fundit të administratës Biden dhe përfundoi përpara se Trump të merrte detyrën të hënën

CIA ka publikuar  një vlerësim të ri mbi origjinën e  COVID-19, duke thënë se koronavirusi ka më shumë gjasa të ketë rrjedhur nga një laborator kinez sesa të ketë ardhur nga kafshët,transmeton Albinfo.ch.

Sipas zëdhënësit të CIA-s  origjina e virusit mund të lidhet me hulumtimet për pandeminë  dhe jo siç pretendohet në raportet zyrtare të mëparshme.

Publikimi i këtij vlerësimi është një ndër vendimet e para të drejtorit të ri të CIA-s, John Ratcliffe, i emëruar nga Donald Trump, i cili mori përsipër agjencinë këtë javë, shkruan BBC.

Ratcliffe, i cili shërbeu si drejtor i inteligjencës kombëtare gjatë mandatit të parë të Presidentit Trump, ka favorizuar prej kohësh teorinë e rrjedhjes së laboratorit, duke pretenduar se COVID ka shumë të ngjarë të ketë ardhur nga një rrjedhje në Institutin e Virologjisë Wuhan, raporton TCH, transmeton albinfo.ch.

Instituti është 40 minuta me makinë nga tregu Huanan ku u shfaq grupi i parë i infeksioneve.

Në një intervistë me Breitbart News të publikuar të premten, Ratcliffe tha se ai dëshironte që CIA të braktiste qëndrimin e saj neutral për origjinën e virusit.

“Një nga gjërat për të cilat kam folur shumë është adresimi i kërcënimit nga Kina në disa fronte të ndryshme dhe kjo shkon prapa tek arsyeja pse vdiqën një milion amerikanë dhe pse Agjencia Qendrore e Inteligjencës ka qëndruar mënjanë për pesë vjet, në mosbërjen e një vlerësimi për origjinën e COVID”, tha ai.

Por zyrtarët i thanë mediave amerikane se vlerësimi i ri nuk bazohej në inteligjencë të re dhe i paraprin administratës Trump. Raportohet se rishikimi u urdhërua në javët e fundit të administratës Biden dhe përfundoi përpara se Trump të merrte detyrën të hënën.

---