Kina i përgjigjet SHBA-së me tarifa

Kina u është përgjigjur tarifave të vendosura nga Amerika, duke u vënë po ashtu tarifa disa importeve që vijnë prej Shteteve të Bashkuara të Amerikës, duke rinisur një luftë tregtare mes dy ekonomive më të mëdha në botë.

Tarifa shtesë 10 për qind në të gjitha importet nga Kina në SHBA do të hyjë në fuqi të enjten, pasi presidenti Donald Trump përsëriti se Pekini nuk ka bërë mjaftueshëm për të ndalur rrjedhjen e drogave në SHBA.

Menjëherë, si përgjigje, Ministria e Financave në Kinë ka thënë se do t’i përgjigjet me tarifë 15 për qind ndaj qymyrit dhe gazit natyror nga SHBA-ja dhe 10 për qind tarifë mbi naftën e papërpunuar, pajisjet bujqësore dhe disa automjete.

Kina po ashtu ka nisur edhe hetime anti-monopol ndaj Google-it.

Edhe Ministria e Ekonomisë dhe Dogana në Kinë ka thënë se do të shtojë kontrollet mbi eksportet e metaleve që janë kritike për pajisjet e teknologjisë dhe tranzicionin e energjisë së pastër.

Tarifat e reja të Kinës me cak ndaj produkteve amerikane do të nisin më 10 shkurt, ka njoftuar Pekini, duke thënë se shtetet kanë ende kohë që të mbërrijnë marrëveshje.

Presidenti amerikan Donald Trump planifikon të flasë me presidentin kinez Xi Jinping më vonë gjatë javës, ka njoftuar një zëdhënës i Shtëpisë së Bardhë.