Ishulli grek Santorini zbrazet pothuajse tërësisht

@pixabay

Dy të tretat e 16 000 banorëve të Santorinit janë larguar drejt kontinentit, pasi lëkundjet që kanë tronditur ishullin për 13 ditët e fundit vazhduan edhe sot.

”Policia ka shtuar patrullimet e saj në rrugët boshe të ishullit për shkak të frikës se mund të ndodhin grabitje”, raportoi kanali i lajmeve ERTnews.

Ministria e Mbrojtjes së Qytetarëve ka rritur numrin e shërbimeve të urgjencës në ishujt e prekur si Santorini, Ios, Amorgos dhe Anafi.

”Zjarrfikësit dhe punonjësit e shpëtimit me qen kërkimi janë në terren, si dhe punonjësit e kompanive të energjisë elektrike, të cilat mund të përdorin gjeneratorë të mëdhenj në rast të ndërprerjes së energjisë pas një tërmeti të fortë”, tha zëdhënësi i qeverisë Pavlos Marinakis.

Tërmetet vazhduan deri të martën mbrëma në intervale nga një deri në 15 minuta.

Sizmologët dhe gjeologët shohin opsione të ndryshme se si mund të zhvillohet situata

Ata thonë se mund të ndodhë një tërmet i madh me magnitudë 6,0 ballë Rihter, duke lehtësuar tensionin e krijuar dhe duke sjellë qetësi.

Seria e tërmeteve mund të kulmojë gjithashtu me një goditje masive me magnitudë 7,0 ballë ose më shumë, e cila mund të rezultojë në cunami, dëme të rënda dhe vdekje të mundshme.

Përndryshe, tërmetet e vogla dhe të moderuara mund të vazhdojnë për javë, apo edhe muaj, përpara se të zhduken.

Ata paralajmërojnë gjithashtu se tërmetet e vazhdueshme mund të zgjojnë dy vullkanet e mëdha të rajonit, duke shkaktuar shpërthimin e tyre.