Irani paralajmëron SHBA-në për pasoja pas sulmeve ajrore

Keystone (AP Photo/Leo Correa)

Irani ka reaguar me tone të ashpra pas sulmeve ajrore të Shteteve të Bashkuara ndaj objekteve të tij bërthamore, duke i cilësuar ato si “shkelje të rëndë” të së drejtës ndërkombëtare dhe një cenim të qartë të sovranitetit të vendit, transmeton albinfo.ch.

Kryediplomati iranian, Abbas Araqchi, ka dënuar ashpër zhvillimet e mëngjesit të sotëm, duke i quajtur ato “tronditëse” dhe duke paralajmëruar Uashingtonin për pasoja të mundshme.

“Në përputhje me Kartën e OKB-së dhe dispozitat që lejojnë reagim të ligjshëm në vetëmbrojtje, Irani rezervon të gjitha opsionet për të mbrojtur sovranitetin, interesat dhe popullin e vet,” shkroi Araqchi në një deklaratë në platformën X (ish-Twitter).

Sipas Teheranit, sulmet përbëjnë një shkelje të trefishtë: të Kartës së Kombeve të Bashkuara, të së drejtës ndërkombëtare, si dhe të Traktatit për Mospërhapjen e Armëve Bërthamore (NPT), të cilit Irani është nënshkrues, transmeton albinfo.ch.