Gjermani kërkon rimbursim prej 2.4 miliardë CHF – Zvicra ndalon pagesën në minutën e fundit

Në shikim të parë, aplikimi dukej i plotë dhe korrekt, por pas një inspektimi më të afërt, administrata tatimore zbuloi se formulari online ishte plotësuar gabimisht

Një qytetar gjerman ka kërkuar një rimbursim prej 2.4 miliardë CHF të taksës burimore nga Zvicra. Kjo taksë mbi fitimet kapitale, mbahet automatikisht në Zvicër, transmeton albinfo.ch. Për shkak të informacionit të pasaktë, qeveria federale ndaloi mega-pagesën në minutën e fundit.

Nuk dihet nëse aplikanti është një kompani apo një individ. Duke ju referuar sekretit tatimor që funksionon në Zvicër, autoriteti përgjegjës zviceran po i mban detajet e mëtejshme konfidenciale.

Në shikim të parë, aplikimi dukej i plotë dhe korrekt, por pas një inspektimi më të afërt, administrata tatimore zbuloi se formulari online ishte plotësuar gabimisht, shkruan blick.ch. Pjesë të kërkesës për rimbursim ishin ose të pajustifikuara ose të humbura. Zbulimi u bë përmes një analize automatike të rrezikut dhe një shqyrtimi manual nga një punonjës. Kërkesa më pas u anulua dhe pagesa u pengua.

Administrata Federale e Taksave deklaroi në raportin e saj vjetor se aplikanti nuk kishte dhënë informacionin e kërkuar në mënyrë të plotë dhe të saktë, përcjell albinfo.ch. Prandaj, shuma nuk mund të paguhej.

Administrata tatimore la të hapur nëse aplikanti kishte të drejtë në të vërtetë për 2.4 miliardë CHF të deklaruara fillimisht.

Zvicra ka lidhur një marrëveshje me Gjermaninë për rikthimin e taksave burimore, e cila u lejon të huajve të kërkojnë zbritjet e tyre. Kjo shumë është 20 për qind.

---