Ndryshim i madh i motit në Evropë dhe Ballkan: Fundi i valës së nxehtësisë

Vala e nxehtësisë që ka përfshirë Evropën dhe Ballkanin po i afrohet fundit, pasi pritet një ndryshim i madh i kushteve të motit. Masa të ftohta ajrore po zbresin nga veriu drejt jugut, duke krijuar kushte për stuhi të forta me shi, vetëtima, bubullimë dhe breshër, sidomos në Evropën Qendrore dhe Ballkanin Veriperëndimor.

Në rajonin tonë, nxehtësia do të zgjasë deri të martën. Pas kësaj, ajri i freskët do të mbërrijë duke sjellë rënie temperaturash dhe rrebeshe lokale shiu, të cilat nuk do ta zbusin ndjeshëm thatësinë ekstreme.

Reshjet më të mëdha priten në veri të Italisë, Slloveni, Kroaci, Austri, Gjermani, Zvicër dhe më pas në Evropën Verilindore. Cikloni që po formohet nuk do të lëvizë drejt rajonit të Ballkanit, prandaj edhe reshjet do të jenë më të pakta.

Nga sot në veri të Italisë priten stuhi të forta, ndërsa Franca, Gjermania dhe Austria do të përjetojnë reshje intensive. Ka mundësi për stuhi të fuqishme me potencial dëmtimesh në veri të Italisë, si dhe në disa pjesë të Sllovenisë dhe Kroacisë, raporton meteo Ballkan, transmeton albinfo.ch.

Kjo do të thotë se vapa e fortë verore do të vazhdojë edhe dy ditë. Të martën, vala e nxehtësisë do të marrë fund edhe tek ne, me reshje më të dukshme në Mal të Zi dhe veri të Shqipërisë, ndërsa në Kosovë priten rrebeshe kalimtare dhe më të pakta.

Të mërkurën, ajri i freskët do të mbulojë gjithë rajonin, duke sjellë temperatura më të ulëta dhe reshje të herëpashershme, por pa shira të mëdha.

Pra, vala e nxehtësisë po përfundon fillimisht në Evropë dhe më pas edhe në Ballkan. Masa të ftohta nga Skandinavia do të sjellin net dhe mëngjese të freskëta për disa ditë, por në gjysmën e dytë të korrikut priten përsëri valë të reja nxehtësie të shoqëruara me rrebeshe verore, vetëtima dhe bubullima.