Më shumë se 1,000 persona kanë humbur jetën nga vala e të nxehtit në Spanjë në dy muajt e fundit

Temperaturat ekstreme që kanë përfshirë Spanjën gjatë dy muajve të fundit kanë shkaktuar vdekjen e 1,180 personave, njoftoi të hënën Ministria e Mjedisit. Ky numër paraqet një rritje të ndjeshme krahasuar me të njëjtën periudhë të vitit të kaluar, kur ishin regjistruar vetëm 70 vdekje të lidhura me të nxehtin.

Sipas autoriteteve, shumica e viktimave ishin persona mbi moshën 65 vjeç dhe më shumë se gjysma ishin gra. Rajonet më të prekura rezultojnë të jenë Galicia, La Rioja, Asturias dhe Cantabria – zona në pjesën veriore të vendit, ku tradicionalisht verërat janë më të freskëta, por këtë vit janë shënuar temperatura mbi 40 gradë Celsius.

“Ngjarja karakterizohet nga një rritje e paparë e temperaturave mesatare dhe një rritje e ndjeshme e vdekshmërisë që i atribuohet valëve të të nxehtit,” thuhet në deklaratën e ministrisë, duke cituar të dhënat nga Instituti i Shëndetit Carlos III.

Spanja, ashtu si shumica e vendeve të Evropës Perëndimore, po përballet me temperatura të larta përtej normales, të cilat janë intensifikuar gjatë javëve të fundit, duke vënë në rrezik të lartë veçanërisht grupet vulnerabël si të moshuarit dhe personat me sëmundje kronike.