YouTube me rregulla të reja të ashpra për përmbajtjen e krijuar nga inteligjenca artificiale

(KEYSTONE/Christian Beutler)

YouTube ka njoftuar ndryshime të rëndësishme në politikat e monetizimit që hyjnë në fuqi më 15 korrik. Këto masa synojnë të kufizojnë videot joautentike, veçanërisht ato të krijuara nga inteligjenca artificiale dhe që konsiderohen të përsëritura ose të prodhuara në masë.

Edhe pse platforma e cilëson këtë si një “ndryshim të vogël” në udhëzimet ekzistuese, qëllimi është i qartë. Synohet të ndalohen përmbajtjet me vlerë të ulët që dominojnë trendet, si zëra të gjeneruar nga kompjuteri, foto të marra online apo lajme të ritreguara pa ndonjë kontribut real njerëzor.

Ndikimi te Programi i Partnerëve në YouTube

Rregullat prekin të gjithë krijuesit që fitojnë para nga reklamat përmes Programit të Partnerëve në YouTube (YPP). Kompania thekson se “origjinaliteti” ka qenë gjithmonë kusht bazë për monetizim, por tani është sqaruar më qartë se çfarë konsiderohet përmbajtje joautentike në epokën e AI.

Sipas Rene Ritchie nga ekipi i marrëdhënieve me krijuesit, synimi nuk është të penalizohen videot me reagime apo komente mbi klipe ekzistuese, por të ndalohen përmbajtjet e tepërta, të përsëritura dhe spam që nuk ofrojnë asnjë vlerë.

Pse YouTube po e ndërmerr këtë hap?

Krijimi i shpejtë i përmbajtjeve të rreme, nga lajmet e trilluar te videot me CEO-n e YouTube të gjeneruar nga AI, po rrezikon besueshmërinë e platformës. YouTube e sheh këtë veprim si një mënyrë për të mbrojtur integritetin dhe markën e saj, duke parandaluar përhapjen e dezinformatave dhe komercializimin e tepërt të përmbajtjeve të pavlera.