Bitcoin arrin vlerën rekord mbi 120,000 dollarë gjatë “Javës së Kriptovalutave” në SHBA

Bitcoin ka kapur një nivel rekord duke kaluar 121,400 dollarë, me pritshmëri që çmimi të arrijë 125,000 dollarë deri në shtator. Kjo rritje po mbështetet nga blerjet afatgjata të investitorëve institucionalë.

Megjithatë, ekspertët paralajmërojnë për një mundësi rënieje në javët e ardhshme për shkak të tarifave tregtare të SHBA-së ndaj BE-së, Meksikës dhe partnerëve të tjerë. Por, investitorët duket se po e nënvlerësojnë këtë rrezik.

Një faktor tjetër i rëndësishëm është fakti se Kongresi Amerikan po përgatit ligje të reja për rregullimin e kriptovalutave në kuadër të ‘Javës së Kriptovalutave’, që pritet të sjellë më shumë qartësi dhe mbështetje për industrinë.

Presidenti Donald Trump, i njohur si mbështetës i kriptovalutave, ka treguar interes dhe përfshirje në këtë sektor. Gjithashtu, edhe monedhat dixhitale të tjera kanë përjetuar rritje nga 10% deri në 30%.