Tajlanda mbyll kufirin me Kamboxhën, përshkallëzohet konflikti: 12 të vdekur

Lufta - unsplash

Zyrtarët tajlandezë kanë njoftuar se Tajlanda ka mbyllur kufirin e saj me Kamboxhën pasi konflikti mes dy vendeve fqinje është intensifikuar, përcjell albinfo.ch.

“Ne kemi rritur masat në nivelin 4, që nënkupton mbylljen e plotë të të gjitha pikave kufitare përgjatë kufirit Tajlandë-Kamboxha,” ka deklaruar Surasant Kongsiri, zëdhënës i Qendrës Speciale për Situatën Kufitare Tajlandë-Kamboxha, raporton BBC.

Surasant ka thënë se Tajlanda ndjeu veten “të detyruar dhe të shtyrë” të mbyllë kufirin, pasi situata kishte dalë jashtë kontrollit.

Ndërkohë, nga Ministria e Shëndetësisë është bërë e ditur se bilanci i viktimave nga përplasjet ka shkuar në 12, mes tyre 11 civilë dhe një ushtarak.

Raportime lokale kanë treguar për zhvendosje të banorëve nga zonat kufitare dhe prezencë të shtuar ushtarake.

Kujtojmë se përleshjet vdekjeprurëse shpërthyen mëngjesin e së enjtes mes trupave tajlandeze dhe kamboxhiane pranë tempullit hindu Khmer Ta Muen Thom, një vend i lashtë dhe simbolik që ndodhet në një zonë kufitare të kontestuar mes dy shteteve.