Aksident me teleferik në Lisbonë – 15 të vdekur

Zëdhënësi i ekipit të shpëtimit nuk dha informacion mbi kombësitë e viktimave. Ai deklaroi se 18 veta janë plagosur

Pesëmbëdhjetë persona u vranë pas daljes nga shinat të funikularit (lloj teleferiku) historik “Elevador da Gloria” në Lisbonë.

Këtë lajm ua ka dhënë gazetarëve një zëdhënës i ekipit të shpëtimit, në kryeqytetin portugez, transmeton albinfo.ch.

Zëdhënësi i ekipit të shpëtimit nuk dha informacion mbi kombësitë e viktimave. Ai deklaroi se 18 veta janë plagosur, shkruajnë mediat botërore.

Imazhet tregojnë se makina u përplas me një mur ndërtese me ç`rast u shkatërrua plotësisht.

Funikulari “Gloria” kalon nëpër një rrugicë të ngushtë dhe të pjerrët. Ai lidh qendrën e qytetit me lagjen popullore Bairro Alto, ku ndodhen shumë restorante. Lagjja dhe funikulli janë gjithashtu atraksione të mëdha turistike.

“Elevador da Gloria” u hap në vitin 1885 dhe është një nga tre teleferikët historikë të qytetit të Lisbonës. Ai lidh sheshin qendror Praça dos Restauradores me lagjen më të lartë Bairro Alto, duke mbuluar një distancë prej afërsisht 200 metrash, transmeton albinfo.ch. Sot, teleferiku është kryesisht një atraksion turistik, por përdoret edhe nga shumë vendas për të cilët rruga është shumë e pjerrët për të ecur në këmbë.

---